Inyamiri zaiyi shugaban kasa bayan na Kammala – Atiku

0

Dan takarar shugaban kasa a jam’iyyar PDP Atiku Abubakar ya ce ’yan kabilar Igbo za su iya zama shugaban kasa ne kawai bayan ya kammala wa’adinsa.

 

Atiku ya kuma sha alwashin ba da fifikon ayyukan raya kasa a yankin Kudu maso Gabas da sauran yankuna idan aka zabe shi, yana mai cewa duk wani aiki da aka yi a kowace jiha alheri ne ga Najeriya.

 

Atiku, wanda ke jawabi ga masu ruwa da tsaki na jam’iyyar PDP na Kudu maso Gabas a Enugu ranar Talata, ya ce: “Ni ne matakin da ‘yan kabilar Igbo za su iya zama shugaban Najeriya”.

 

Dan takarar na PDP, wanda ya tabbatar da cewa shi ne zai lashe zaben shugaban kasa a 2023, ya ce babbar alakarsa da kabilar Igbo za ta ci gaba da kasancewa har sai sun karbi shugabancin kasar bayan wa’adinsa.

 

“Ina da dangantaka ta kut-da-kut da ’yan kabilar Igbo kuma hakan ya yi tasiri a kan zaben da na yi wa Sanata Ben Obi da Mista Peter Obi a matsayin abokan takarara a fafatawar da na yi a baya a matsayin dan takarar shugaban kasa. Na sake zabar wani babban dan kabilar Ibo a nan (Dr. Ifeanyi Okowa) a karo na uku a matsayin abokin takarara.

 

“Ina da ‘ya’yan kabilar Igbo guda uku, kuma a karon farko ina fadin haka a bainar jama’a. Don haka dangantakara da Ndigbo ba yau ta fara ba,” in ji Atiku.

 

Yayin da yake alkawarin ba da fifiko kan ayyuka a yankin Kudu maso Gabas, Atiku ya yi kakkausar suka ga gwamnatin APC da ta raba wasu sassan kasar nan da karancin ayyuka.

 

“Gadar Neja ta biyu da ke Onitsha ba alheri ba ce ga yankin Kudu maso Gabas, a’a, ko kuma a yi la’akari da ita a matsayin alheri ga Najeriya. Domin kuwa ba mutanen Kudu maso Gabas ne kadai ke amfani da gadar ba,” inji Atiku.

 

Ya kuma nuna damuwarsa kan zaman dar-dar da ake yi a yankin wanda a cewarsa ya haifar da babbar illa ga tattalin arzikin yankin da ma kasa baki daya, inda ya yi kira ga dattawan yankin da su tofa albarkacin bakinsu kan lamarin.

 

Ya ce gwamnatinsa za ta mai da hankali sosai wajen magance matsalar rashin tsaro, tattalin arziki da sauran matsalolin da suka addabi kasar nan.

LEAVE A REPLY

Please enter your comment!
Please enter your name here